ЛИЧНА КАРТА НА РЕПУБЛИЧКИОТ ЗАВОД ЗА ЗДРАВСТВЕНА ЗАШТИТА - СКОПЈЕ

Институционализацијата на преветивната дејност на просторот на Македонија почнала во дваесеттите години на минатиот век. Хигиенскиот завод, чија функција била заштита и унапредување на здравјето на луѓето е формиран под покровителство на д-р Андреја Штампар и со учество на Рокфелеровата фондација во Скопје, 1924 год. Оваа медицинска установа од превентивен карактер дејствувала во услови кога главно обележје на националната патологија во тој период биле заразните болести.

Темелите, пак, на современата организација и достигнувањата во превентивната здарвствена заштита во Македонија и на Републичкиот завод за здравствена заштита како врвна специјализирана институција во таа област биле поставени непосредно пред Втората светска војна.

РЗЗЗ одигра голема улога во спроведувањето на континуираната вакцинација, чии темели се воспоставени во 1961 година. Спроведувањето на перманентната вакцинација и програмските активности за подобрување на санитарно-хигиенската и епидемиолошката состојба на населението во Македонија резултираше со ерадикација на маларијата и пегавиот тифус и постојано опаѓање на заразните болести.

Во јуни 2002, Република Македонија, заедно со другите земји од Европскиот регион доби сертификат за ерадикација на детската парализа. Дифтеријата не е регистрирана од 1973, а малите сипаници и неонаталниот тетанус се пред елиминација.

ЈЗО Републички завод за здравствена заштита е важна мултидисциплинарна, научна и наставна установа, која дејствува во областа на превентивната медицина во Република Македонија со тендеција да прерасне во референтна и меѓународно стручно призната институција.

РЗЗЗ во својата организациона структура има:

• Сектор за епидемиологија и микробиологија
• Сектор за хигиена и заштита на човековата околина
• Сектор за социјална медицина
• Сектор за контрола и испитување на лекови
• Сектор за правно и финансиско работење